İdman

Azərbaycanda idmana dövlət tərəfindən göstərilən yüksək diqqət və qayğı İqtisad Universitetinin idman həyatına da əhəmiyyətli təsir göstərmişdir. Belə ki, UNEC-də tələbələrin və əməkdaşların fiziki sağlamlığı, asudə vaxtlarının səmərəli təşkili istiqamətində məqsədyönlü kompleks tədbirlər həyata keçirimiş və müvafiq maddi-texniki baza və infrastruktur yaradılmışdır. Universitetin II tədris binasında yerli və beynəlxalq yarışların keçirilməsi üçün tələb olunan ən müasir standartlara uyğun olan voleybol və basketbol zalı, IV tədris binasında ən müasir avadanlıqlarla təchiz olunmuş əl oyunları idman zalı, trenajor zalları, lazımı avadanlıq və texniki vasitələrlə təmin edilmiş Şahmat Klubu kollektivin istifadəsinə verilmişdir.

Quba rayonunda ən müasir avadanlıqlarla, üzgüçülük hovuzu və idman zalları ilə təmin edilmiş 1500 tamaşaçı yeri olan İdman-sağlamlıq kompleksi inşa edilmişdir. Universitetin tələbələri voleybol, şahmat, futbol, basketbol, həndbol, yüngül atletika, stolüstü tennis, güləş və digər idman növləri üzrə bölmələrə müraciət edərək beynəlxalq dərəcəli idman ustaları tərəfindən aparılan məşqlərdə iştirak edirlər. Universitetdə idmana marağı daha da stimullaşdırmaq üçün hər il mütəmadi qaydada həm tələbələr, həm də universitet əməkdaşları arasında müxtəlif idman növləri üzrə yarışlar, turnirlər keçirilir. Qaliblər mükafatlandırılmaqla yanaşı, ali təhsil ocağımızı ümumrespublika və beynəlxalq yarışlarda təmsil etmək hüququ qazanırlar.

Universitetdə idmana olan diqqət və qayğının nəticəsi özünü ali təhsil ocağının idman sahəsində ilbəil artmaqda olan uğurlarında büruzə verir. Belə ki, UNEC-in mini-futbol üzrə komandası respublika universiadalarının qalibi, eləcə də Milli Qəhrəman Mübariz İbrahimov adına keçirilən turnirin ilk qalibi olmuşdur. Universitetin tələbələri və məzunları arasında dünya və Avropa çempionları, beynəlxalq idman ictimaiyyəti tərəfindən tanınmış idmançılarımız da çoxdur.

UNEC-in tələbələri bir sıra Beynəlxalq yarışların qalibi ol­muşlar: Şəhriyar Məmmədyarov 2010-cu ildə Moskvada keçiri­lən “Tal Memo­rial”ının, Eltac Səfərli Sankt-Peter­burqda keçirilən “Çiqorin Memorial 2010” turnirinin, Fidan Ağasıyeva Turkiyədə keçiri­lən Türkdilli ölkələrin ali məktəbləri arasında Şahmat Olimpiadasının qalibi olmuşlar.